Високи американски воени и правосудни претставници се информирани за нападите во Брисел, а ФБИ веќе почна координација со другите американски безбедносни агенции и со белгиските власти, изјавија денеска американски претставници, цитирани од британските медиуми.
Министерот за одбрана Аштон Картер и претседателот на Советот на началници на штабови на американската армија, генерал Џозеф Данфорд, се запознати со ситуацијата, изјавија изворите.
Министерот за правда и главен обвинител Лорета Линч, исто така, е информирана за експлозиите, изјави претставник на Министерството за правда.
Според него, министерството и ФБИ ги усогласуваат своите напори со другите американски агенции и со белгиските власти.