Пентагон побара од американската одбранбена индустрија итно да го зголеми производството и испораката на оружје, особено на муниција, чии резерви значително се намалиле поради војната со Иран.
Американскиот заменик-министер за одбрана Стив Фајнберг во допис испратен до директорите на компании од одбранбената индустрија побара од нив во рок од 21 ден да достават планови за значително побрза испорака и зголемување на производството на критични воени капацитети.
Дописот, до кој увид имал „Вашингтон пост“, покажува дека Пентагон сака одбранбените компании веднаш да ги прошират производствените капацитети и да ги скратат роковите за испорака.
– Повеќегодишни циклуси на развој не се прифатливи. Мора драматично да ги забрзаме роковите на нашите програми и веднаш да ги прошириме производствените капацитети, навел Фајнберг.
Од американското Министерство за одбрана очекуваат компаниите да предложат конкретни мерки со кои ќе може побрзо да се обезбедат потребните количества оружје и муниција.
Барањето доаѓа во услови на зголемена потреба за надополнување на американските воени резерви, откако значителни количества муниција биле потрошени во текот на воениот конфликт со Иран.