Пентагон разгледува радикален план за повлекување на авиони, бродови, оружје и десетици илјади американски војници од Европа, и покрај предупредувањата од сојузниците во НАТО за зголемената закана од руска агресија, објави NBC.
Намалувањето би можело да опфати околу една третина од сите американски војници распоредени во Европа, односно близу 25.000 припадници. Според неколку американски функционери за NBC, намалувањето би можело да биде и поголемо, со повлекување на речиси половина од силите, односно до 40.000 војници.
Доколку планот биде спроведен, тоа би било најзначајното намалување на американското воено присуство во Европа, кое моментално брои околу 80.000 припадници, од периодот по завршувањето на Студената војна во 1990-тите.
Можноста за толку големо намалување предизвика загриженост кај американски конгресмени од двете партии, како и кај европските влади, кои стравуваат дека тоа би можело да ја охрабри Русија.
Таквото повлекување би можело значително да ги промени односите на САД со нивните клучни европски сојузници и да ги принуди европските земји да воспоставуваат нови партнерства во период на нестабилност, додека војни се водат во Украина и на Блискиот Исток.
Меѓу земјите кои би можеле да бидат погодени од намалувањето се Германија, Италија и Шпанија, велат американски и европски функционери. Во овие три земји се распоредени најголем дел од американските сили во Европа. Нивните лидери, исто така, во изминатиот период имаа несогласувања со претседателот Доналд Трамп околу војната со Иран.
Од почетокот на неговиот втор мандат, Трамп и неговите заменици тврдат дека Европа треба да преземе водечка улога во сопствената одбрана, со поддршка од американскиот нуклеарен арсенал. Според нив, американските сили се потребни за справување со поитни закани од Кина и Иран, како и со наркокартелите на западната хемисфера.
Во изминатите месеци Трамп, кој долго време ја доведува во прашање вредноста на НАТО, остро ги критикуваше европските сојузници поради нивното одбивање да им се приклучат на САД во војната против Иран.
Пентагон во јуни најави шестмесечна ревизија на американското воено присуство во Европа. Се очекува генералот на американското воздухопловство Алексус Гринкевич, врховен сојузнички командант на НАТО и командант на Европската команда на САД, во петок да му ја претстави анализата на американскиот секретар за одбрана Пит Хегсет, велат американски и западни функционери.
Анализата на Гринкевич најверојатно ќе содржи четири можни сценарија, кои би можеле да опфатат намалување на бројот на американски авиони, припадници на морнарицата и копнените сили или други воени капацитети. Можно е да се разгледува и преместување на дел од силите во рамки на Европа, вклучително и во земји на источното крило на НАТО.
Хегсет треба да ја добие конечната препорака на 6 ноември, по што таа би била презентирана пред Трамп. Секое евентуално повлекување би следувало потоа.
Според висок функционер на Министерството за одбрана и уште двајца американски функционери, конечна одлука сè уште не е донесена.