Претседателот Володимир Зеленски денес изјави дека Европа мора да учествува во сите преговори насочени кон ставање крај на војната меѓу Украина и Русија, како и дека Соединетите Американски Држави (САД) треба да извршат притисок врз Москва – ова доаѓа по трилатералните мировни разговори во Абу Даби.
– Приоритетот на Украина е војната да заврши што е можно поскоро, со достоинствен мир. Сметам дека Европа мора да биде застапена во секоја фаза од преговорите, напиша тој во објава на платформата X.
Според него, од суштинско значење е САД да заземат цврст став и да извршат влијание врз Русија за да се стави крај на војната во Украина.
„Ѝ благодарам на американската страна за организирањето на средбите и за нивното посредување. Им благодарам на Емиратите што го обезбедија просторот за преговорите, а им благодарам и на Мете и на сите наши европски пријатели за нивниот принципиелен и цврст став во залагањето за мир“, напиша Зеленски.
Дводневните трилатерални преговори меѓу Украина, САД и Русија завршија денес во Абу Даби.
Разговорите се одржаа зад затворени врати, без присуство на медиумите.
Рускиот генерал-полковник Александар Зорин, кој учествуваше во преговорите во Абу Даби, изјави дека Москва и Киев во текот на наредните недели ќе разменат повеќе од 1.000 затвореници.