Парламентот на Тунис, со тајно гласање, денеска и изгласа доверба на технократската Влада на премиерот Хишем Мешиши, во обид да се стави крај на повеќемесечната политичка криза и колапсот на националната економија.
За кабинетот гласаа 134 пратеници, а неопходни беа 109 гласа во парламентот со 217 места. Против беа 67.
Ова е трета Влада на Тунис од минатогодишните парламентарни избори.
Доколку владата на 46-годишниот независен политичар Мешиши не беше одобрена од пратениците, претседателот Каис Сајед можеше да го распушти Парламентот и да распише нови избори.
Новата влада на Тунис има 25 министри и тројца државни секретари. Тие не се членови на политички партии и се академици, државни службеници, бизнисмени и експерти.