Иранскиот министер за внатрешни работи Ескандар Момени вчера започна разговори со мировните посредници во Пакистан, објави АП. Според двајца неименувани пакистански функционери, Момени вчера одржал состанок зад затворени врати со началникот на Генералштабот на пакистанската армија, фелдмаршал Асим Мунир, а потоа и со пакистанскиот премиер Шехбаз Шариф.
Политичкото раководство на Пакистан одигра клучна улога во посредувањето за постигнување на привремениот договор меѓу САД и Иран минатиот месец, соопшти американската агенција, додавајќи дека официјален Исламабад се обидува да ги убеди двете страни да се вратат на преговарачка маса за решавање на отворените прашања во согласност со јунскиот меморандум за разбирање.
Иран нападна танкер во Ормутскиот теснец рано вчера, принудувајќи го екипажот да го напушти бродот, додека САД извршија нова серија воздушни напади врз Иран.
Ескалацијата на конфликтот ги зголеми цените на нафтата и гасот во последните недели, при што суровата нафта Брент денес се тргуваше со речиси 90 долари за барел, додека цената на обичниот бензин во САД се зголеми во просек за 4 долари за галон, што врши притисок врз куповната моќ на Американците пред претстојните избори за Конгресот.
Десеттата ноќ по ред американски воздушни напади не успеа да го принуди Техеран да се откаже од контролата врз Ормутскиот теснец, витален пат за глобалните енергетски снабдувања. Но, дури и кога претседателот на Иран рече дека земјата одговорила со „тотална војна“, патувањето на иранскиот министер за внатрешни работи во Пакистан нуди надеж дека може да се постигне некаков вид примирје.
Најновите американски напади дојдоа неколку часа откако Доналд Трамп изјави дека Иран ќе плати „многукратно“ за убивањето американски војници, откако неколкумина беа убиени во иранската акција за време на викендот. И речиси 100 се повредени во последните две недели од ескалацијата на нападите врз Иран, соопшти Пентагон.
Портпаролот на Пентагон, Шон Парнел, рече дека огромното мнозинство од повредените претрпеле само „мали потреси на мозокот“ и дека 96 проценти оттогаш се вратиле на должност. Парнел одговараше на извештајот на „Њујорк тајмс“ дека Пентагон сокрил информации за повредите на војниците од иранските напади.
Тој негираше дека Пентагон ги крие податоците за повредите.
Иранската револуционерна гарда соопшти дека ги таргетирала американските воени објекти, вклучувајќи ги системите за воздушна одбрана и радарската инсталација во Бахреин и Кувајт. Кувајт, Бахреин и Јордан соопштија дека активирале одбрана за да ги одвратат нападите.
Хутиите во Јемен, поддржани од Иран, објавија дека воведуваат непосредна поморска блокада на Саудиска Арабија во Црвеното Море, откако двете страни се судрија за прв пат по години минатата недела.
Претставник на Хутите изјави дека теснецот Баб ел-Мандеб, на јужниот врв на Црвеното Море, низ кој нормално минува околу 12 проценти од светската трговија, ќе биде затворен за Саудијците како одговор на „неправедната блокада на Јеменците од страна на кралството повеќе од 10 години“.