Франција инсистира на целосна примена на Договорот од Минск за излез од кризата во Украина, изјави францускиот претседател Франсоа Оланд на денешната заедничка прес-конференција со украинскиот претседател Петро Порошенко.
Оланд посочи дека целосно се почитува примирјето во Источна Украина, но оти не е целосно повлечено тешкото вооружување.
Францускиот претседател наведе и дека Париз нема да достави оружје за Киев бидејќи не добил барање од Украина. Тој додаде дека темата за испраќање на меѓународна мировна мисија во Украина со мандат на Обединетите нации не е на дневен ред.
– Ако Советот за безбедност на ОН донесе одлука, тогаш Франција ќе дејствува во согласност со неа, посочи Оланд.
Порошенко истакна дека е неопходна координација на заедничките акции за исполнување на Договорот од Минск, а исто така и изнаоѓање на политички средства за излез од кризата во Донбас.
– ОБСЕ треба деноноќно да набљудува во Источна Украина, а изборите во отцепените области да се одржат под контрола на ОБСЕ, посочи Порошенко.