Претседателот на САД Барак Обама изјави дека Русија може да очекува дополнителни санкции ако ја зајакне поддршката на сепаратистите во Источна Украина.
– Она што секогаш сум сакал да го кажам е дека секој пат, кога Русија презема такви чекори, насочени кон дестабилизирање на Украина и нарушување на нејзиниот суверенитет, ќе има последици, изјави Обама во интервју за телевизијата Си-Би-Ес.
Обама говореше за кризата во Украина, за која категорично ја обвини Москва, во пресрет на средбата во Женева, на која Русија, Украина, САД и ЕУ ќе се обидат да излезат од ќорсокакот.
Американски претставници изјавија дека САД се подготвени да наложат нова серија мерки против Русија, ако преговорите за намалување на напнатоста не успеат.
– Одлуките на Путин не се само лоши за Украина, а на долгорочен план тие ќе бидат лоши и за Русија, истакна Обама.
Според Обама, Русија не е заинтересирана за каква и да е воена конфронтација со САД, кои, според него, имаат „вооружени сили на повисоко ниво“.
– Ние немаме потреба од војна, додаде Обама.