Американскиот претседател Барак Обама и претседателот на Русија, Владимир Путин повикаа за “итно” воспоставување на мир во Сирија.
Повикот од двајцата најголеми ривали дојде откако во медиумите се пласираше информацијата дека Русија, наводно, е подготвена да испрати два воени бродови со маринци во својата поморска база во Сирија, каде што ОН веќе ја суспендираше својата мисија поради ескалацијата на насилство.
„Повикуваме на итен прекин на насилството и крвопролевањата во Сирија“ изјавија двајцата водачи по средбата на групата од Г- 20 самитот во Лос Кабос, Мексико.
“Нашите ставови се обединети во поглед на иднината на Сирија која Сиријците треба да имаат можност да ја изберат самостојно и демократски“- рекоа лидерите.
Путин соопшти пред новинарите дека тој и Обама пронашле „многу заеднички точки” околу 15 -месечното востание против претседателот Башар ал-Асад.
Обама, пак рече, дека тој и Путин се согласиле околу потребата “политичкиот процес” да ги запре конфликтите.