Рускиот претседател Владимир Путин изјави дека Украина може да биде ставена под некаква привремена администрација за да се овозможи одржување на избори и потпишување клучни договори за ставање крај на војната. Ројтерс јавува дека ова рано утринава го соопштија руските државни агенции.
Тој наведува дека Путин за време на говорот во најсеверното руско пристаниште Мурманск рекол и оти верува оти американскиот претседател Доналд Трамп, кој ги подобри односите на Вашингтон со Москва, искрено сака да се стави крај на конфликтот во Украина кој трае повеќе од три години.
Шефот на Кремљ рече дека Русија бележи постојан напредок кон постигнување на своите воени цели.
Британската агенција наведува дека коментарот на Путин за воведување привремена администрација се чини дека се однесува на поплаките што Москва ги упатува долго време дека украинските власти не се легитимен партнер во преговорите бидејќи претседателот Володимир Зеленски остана на власт и покрај истекот на неговиот мандат во мај 2024 година.
– Тоа би се случило за да може да се одржат демократски избори и на власт да се донесе способна влада која ја ужива довербата на народот, а потоа со нив да започнат преговорите за мировен договор. Во принцип, се разбира, може да се воведе привремена администрација во Украина која би била под покровителство на ОН, САД, европските земји и нашите партнери. Тоа би се случило за да може да се одржат демократски избори и на власт да се донесе способна влада која ја ужива довербата на народот, а потоа со нив да започнат преговорите за мировен договор, рече Путин.