Специјализирани криминални картели во Англија и Велс користат дронови за доставување оружје и дрога во затворите, отворајќи „нова ера“ на затворски криминал, соопшти гувернерот на затворот во Манчестер, Роб Најт.
Најт за Скај њуз истакна дека затворот од категорија А во Манчестер, поранешен Стрејнџвејс, станал „ранлив“ на илегални дронови, кои доставуваат ножеви, мачети и дрога до затворениците.
Меѓу април 2024 и март 2025 година регистрирани се 1.712 инциденти со дронови, што претставува пораст од 1.140% во последните пет години. Независниот извештај на Националната канцеларија за ревизија наведува дека затворската служба и владата „преспоро реагираат“ на овие закани поради задоцнето одржување и недоволни буџетски средства за опрема против дронови, што ги прави затворите „ранливи“.
„Се премина од случајни локални криминалци на специјализирани банди кои заработуваат значителни пари и дејствуваат низ целата земја за да ги надмудрат нашите системи“, рече Најт.
Главниот надзорник на полицијата, Луис Хјуз, додаде дека е технички многу тешко да се пресретнат дронови во лет, особено кога не е познато каде се наоѓа пилотот.
Скај њуз сними дронови во акција, вклучително и една достава на дрога директно до прозорецот на затворот, која подоцна беше пресретната од персоналот.
Стручњаците истакнуваат дека многу постари затвори не се дизајнирани да се заштитат од дронови и дека се потребни итни подобрувања во безбедноста на прозорците и надзорот на воздушниот простор.