Најмалку девет лица загинаа, а 37 се ранети минатата ноќ кога двајца бомбаши-самоубијци се саморазнесоа во едно кафуле во северниот либански град Триполи, соопшти Министерството за здравство на Либан.
Како што јави ДПА, нападот се случил во населбата Џабал Мохсен, каде повеќето жители важат за поддржувачи на сирискиот претседател Башар ел Асад.
Во кафулето прво се разнел едниот бомбаш-самоубиец, а кога гостите почнале да бегаат од објектот и вториот напаѓач близу до излезот го активирал експлозивот што го носел на себе.
Одговорност за нападот презеде групата Џебхат ал Нусра, огранок на терористичката мрежа Ал Каеда, која преку Твитер објави дека тој е дело на двајца нејзини припадници со цел „да се одмаздат за убиените сунити во Сирија и Либан“. Како што јави ТАСС, покрај Ал Нусра и џихадистичката група Исламска држава презела одговорност за нападот.
Во Триполи често доаѓа до судири меѓу сунитите и алавитуте, кои зачестија последните години со избувнувањето на граѓанската војна во Сирија.