Истражувачки новинари идентификувале околу 150 воени локации низ Белорусија кои потенцијално би можеле да бидат искористени за распоредување руски сили и повторно отворање на северниот правец кон Украина.
Станува збор за воени бази, аеродроми, магацини за муниција и гориво, полигони и објекти за постојано распоредување воени единици.
Локациите се идентификувани преку анализа на сателитски снимки и други јавно достапни податоци, а посебно внимание привлекуваат белоруските аеродроми кои Русија ги користеше во почетната фаза од инвазијата врз Украина во 2022 година.
Меѓу мапираните локации има и поранешни советски воени бази кои денес не се активно користени, но според авторите на истражувањето би можеле да претставуваат инфраструктурна резерва. Дел од нив потенцијално би можеле повторно да бидат активирани за прием на дополнителни единици или распоредување воена техника.
Белорусија официјално не учествува директно со свои сили во војната во Украина, но нејзината територија има значајна улога уште од почетокот на руската инвазија.
Во февруари 2022 година руските сили влегоа во Украина и од белоруска територија, при што токму северниот правец беше искористен за офанзивата кон Киев. Белоруската инфраструктура беше користена и за логистика, движење на војници и воена техника и други руски воени операции.
Во последните години се забележува и развој и модернизација на дел од воената инфраструктура во Белорусија. Истражување на Радио Слободна Европа од 2025 година, базирано на сателитски снимки, покажа изградба на нови објекти и модернизација на постојните воени локации.
Сепак, актуелните податоци не покажуваат дека Русија во моментов концентрира сили во Белорусија во размери слични на оние пред инвазијата во 2022 година.
Според проценките на независниот институт iSANS, бројот на руски војници на белоруска територија се движи околу 2.200. Анализите не укажуваат на значително зголемување на руското воено присуство, ниту на постојано распоредена голема група руски борбени авиони на белоруските аеродроми.
Во исто време, белоруската армија продолжува со воени вежби, мобилизациски подготовки и подобрување на дел од воената инфраструктура.
Токму поради тоа, воениот потенцијал на Белорусија останува предмет на внимателно следење од Украина. Големиот број бази, полигони, аеродроми, складишта и железничката инфраструктура значат дека земјата располага со капацитет кој, доколку Москва и Минск донесат таква одлука, би можел да се користи за значително поголемо руско воено присуство.
Засега, сепак, идентификувањето на 150 воени локации претставува мапирање на расположливата инфраструктура, а не доказ дека е донесена одлука за нов руски напад врз Украина од територијата на Белорусија.