Одлуката на Европската унија да го вклучи вооруженото крило на Хезболах на својот црн список на терористички организации е избрзана и може да доведе до натамошни санкции против либанското движење, предупреди денеска либанскиот министер за надворешни работи Аднан Мансур.
Според него, наведуваат британските медиуми, одлуката во иднина ќе создаде тешкотии за внатрешната политика на Либан, имајќи ги предвид чувствителните теми на Либанците.
-Треба побрзо да ги зацврстиме врските меѓу либанските партии, место да создаваме дополнителни проблеми, додаде Мансур.
Организацијата Хезболах самата официјално не се дели на вооружено и политичко крило.
Според Амал Саад-Горајеб, авторка на книга за групата, ќе биде многу тешко да се утврди на кои нејзини претставници се однесува забраната.
-Тоа е повеќе политичка, отколку правна одлука Тоа не може да има какви и да било реални правни последици, кажа Саад-Горајеб.
Таа забележува дека одлуката на ЕУ се чини е повеќе пи-ар лекција за оцрнување на меѓународната репутација на Хезболах и повеќе е поврзана со настаните во Сирија, отколку со атентатот во Бугарија.
Одлуката ја става Европа „во конфронтација со овој сегмент луѓе во нашиот регион“, коментира парламентарецот од Хезболах, Ал Валид Сукарија.