Либански патнички авион беше принуден да слета вонредно денеска на аеродромот Рим-Фиумичино, откако тревога за бомба, која се покажа за лажна, предизвика нарушување во воздушниот сообраќај на најголемиот римски аеродром.
Авионот „Ербас-320“ на „Мидл ист ерлајнс“, извршуваше лет од Женева за Бејрут, кога од Швајцарија бил даден сигналот за тревога, откако багажот, кој не припаѓал на ниту еден од патниците, бил откриен во авионот.
Кога авионот бил веќе во воздушниот простор на Италија, два италијански ловци го придружиле до римскиот аеродром.
Вмешувањето на двата италијански воени авиони предизвикала тревога кај населението во околината на Рим, бидејќи двете летала ја пробиле звучната бариера, за да можат побрзо да го стигнат либанскиот авион.
Тој бил приземјен на резервната писта и патниците биле симнати, за да биде извршена проверка од деминери, кои не откриле никакво експлозивно средство.