Еврокомесарката за здравство, Стела Кириакидес, порача денеска пред Европскиот Парламент дека Европската Комисија е свесна за грешките и извлекла поука во однос на стратегијата за вакцинација во ЕУ, јави дописничката на МИА од Брисел.
Кириакидес одговараше на критиките и забелешките на европратениците на денешната пленарна седница посветена на стратегијата за вакцинација против Ковид-19 во ЕУ.
– Правиме сѐ што можеме да се бориме против вирусот во ЕУ и ширум светот, јасно е сега дека ќе се соочиме со предизвикот само ако бидеме сплотени, се бориме против заеднички непријател, а вакцините се клучот за излез од кризата, изјави еврокомесарката за здравство.
Таа нагласи дека целта на ЕУ е до летото да бидат вакцинирани 70 отсто од европското возрасно население и дека вакцините треба да бидат дистрибуирани еднакво во земјите членки без оглед на нивната големина.
Кириакидес додаде дека ЕУ има „морална одговорност“ и кон земјите од соседството и другите земји во светот.
– Ги извлековме лекциите и веќе делуваме врз основа на тоа, рече еврокомесарката.
Таа ги увери европратениците дека Комисијата го „споделува чувството на итност“.
– Ќе има и нови предизвици, појавувањето на нови варијации придонесува кон ова, мораме да соработуваме, во ова сме сите заедно, истакна Кириакидес.
Португалското претседателство изрази „целосна“ поддршка за работата на Европската Комисија.
– Во спротивно наместо да соработуваме, сега ќе се натпреварувавме едни со други со многу малку ресурси, изјави државната секретарка за ЕУ на Португалија, Ана Закариас.
Португалија, рече таа, е свесна за пропустите, но нагласи дека ЕУ солидарноста била клучна за зацврстување на националните здравствени системи.