Русија изгледа го следи „истото сценарио на хибридна војна“ кон поранешната советска република Молдавија, изјави вчера врховниот главен командант на Обединетите вооружени сили на НАТО во Европа генерал Филип Бридлав, јави БТА.
Бридлав истакна дека Москва се вмешала во Украина по зголемувањето на нередите од страна на проруските жители и бунтовниците. Тој рече дека „мали зелени човечиња“, војници во униформи без распознавачки обележја им помогнале на бунтовниците да ја контролираат воената ситуација во Украина.
Во исто време Русија натрупа воени сили и резерви на границата под изговор вежби.
– Веќе видовме мали зелени човечиња во Крим и во Источна Украина. Почнавме да гледаме дел од тоа сценарио во Молдавија и Придњестровје, изјави генерал Бридлав во дискусија на центарот за анализи „Атлантски совет“.
– Откако НАТО вече има заедничко видување како Русија ги користи тактиките за хибридна војна, важно е да се реши како да им помогне на земјите од Источна Европа да издржат на првичниот притисок. НАТО може да се вмеша само ако има јасен надворешен агресор, заклучи Бридлав.