Новата варијанта на коронавирусот „Омикрон“ може да испадне дека е „божиќен подарок“ доколку предизвикува полесни симптоми, тврди германски здравствен експерт откако јужноафриканските лекари денеска рекоа дека сојот предизвикува помалку сериозни симптоми.
Лекарите во Јужна Африка рекоа дека сојот предизвикува благи симптоми, како што се главоболка и замор и дека тој не доведе до ниту една хоспитализација или смрт.
Професорот Карл Лаутербах, клинички епидемиолог кој е во трка да биде следниот германски министер за здравство, вели дека раните извештаи покажуваат дека омикрон може да биде божиќен подарок и дури да го забрза крајот на пандемијата.
Тој сугерираше дека има толку многу мутации, 32 само на шилестиот протеин, двојно повеќе од Делта – што може да значи дека е оптимизиран да инфицира и да биде помалку смртоносен, во согласност со тоа како еволуираат повеќето респираторни вируси.
Ова исто така би бил позитивен знак, бидејќи покажува дека високомутираната варијанта не е целосно непрепознатлива за имунолошкиот систем на преживеаните од Ковид или вакцините.
Научниците долго време предупредуваат дека коронавирусот веројатно нема да биде искоренет, но наместо тоа ќе премине во поблаг вирус сличен на настинка.
Сепак, експертите денеска предупредија дека им требаат најмалку две недели за да утврдат какво влијание ќе има варијантата омикрон, поради времето потребно за некој сериозно да се разболи откако ќе го фати вирусот.
На научниците, исто така, им требаат најмалку две недели за да откријат дали загрижувачките мутации на омикрон би можеле да го направат позаразен од Делта и отпорен на вакцини во реалниот свет.