ЕУ се надева дека Турција нема да дозволи толкав голем број имигранти да дојдат до Грција, колку минатата година, но веќе работи на алтернативни планови за сместување на голем број мигранти, изјави еврокомесарот за миграции Димитрис Аврамопулос.
Аврамопулос рече дека не е познато во колкав степен Турција ќе успее да го намали бројот на мигрантите, откако времето ќе затопли, пренесе БТА.
– Додека нашиот договор за соработка со Турција не почне да дава резултати, ситуацијата никако нема да биде лесна. Нивниот прилив ќе продолжи. Затоа веќе почнавме да работиме за планирање во случај на непредвидени околности, додаде тој.
Аврамопулос рече дека во последните две седмици, бројот на пристигнатите имигранти драстично се намалил и покрај поволните услови за пловење, но во средата повторно се зголемил.