Доналд Трамп одобри Закон со кој се воведува царина од 500 отсто за купување евтина руска нафта, а ТАСС наведува дека законот ги вклучува и нафтата и гасот.
„По многу продуктивниот состанок денес со претседателот Трамп за различни прашања, тој даде зелено светло за двопартискиот закон за санкции против Русија, на кој работев со месеци со сенаторот Блументал и многу други“, објави американскиот сенатор Линдзи Греам на социјалната мрежа X.
„Ова ќе биде навремено бидејќи Украина прави отстапки за мир, додека Путин само зборува, а продолжува да убива невини. Овој закон ќе му овозможи на претседателот Трамп да ги казни оние земји што купуваат евтина руска нафта што ја напојува воената машина на Путин“, рече сенаторот.
„Овој закон би му дал на претседателот Трамп огромна предност во однос на земји како Кина, Индија и Бразил за да ги охрабри да престанат да купуваат евтина руска нафта што го финансира крвопролевањето на Путин против Украина. Со нетрпение очекувам силно двопартиско гласање, се надевам следната недела“, додаде тој.
Законот беше поддржан на почетокот на април од двопартиска група сенатори предводени од Греам и Ричард Блументал, демократ од Конектикат.
Мерката предвидува секундарни санкции против трговските партнери на Русија, како што е царина од 500 отсто за увоз во САД од земји кои купуваат нафта, гас, ураниум и други стоки од Русија, пренесува ТАСС.