Единаесет африкански држави вчера го потпишаа мировниот план на Обединетите нации за стабилизација на Конго, каде што бунтовниците се обидоа да ја соборат владата во 2012 година, наводно, со поддршка од соседите.
На вчерашното потпишување во Етиопија, генералниот секретар на ОН, Бан Ки Мун рече дека нацрт планот за мир, безбедност и соработка во Конго ќе донесе стабилност во регионот.
Според ОН, за насилството во Конго се одговорни локалните и странски вооружени групи кои го користат силувањето како средство. Бројот на бегалци достигна два милиона.
Соседните земји заедно ветија дека нема да се мешаат во внатрешните работи на Конго и дека нема да поддржат ниедна вооружена група.
Во извештајот на ОН од 2012 година, се вели дека Руанда и Уганда им помагале на бунтовниците на групата M23 во Конго, што обете земји го демантираа.