Парламентот на Јужна Кореја изгласа зголемување на цените на тутунот за 80 отсто за да сузбие пушење, јавуваат јужнокорејски медиуми.
Мерката е донесена во рамки на државниот буџет за 2015 година изгласан синоќа.
Предвидено е од 1 јануари 2015 година еднa кутија цигари да поскапе од 2.500 јужнокорејски вони (1,8 евра) на 4.500 вони (3,35 евра). Владата смета дека со таа одлука би требало да се намали потрошувачката на цигари за 35 отсто до крајот на 2016 година.
Во Јужна Кореја има околу 44 отсто мажи кои пушат цигари. Меѓу членките на Организацијата за економска соработка и развој, Јужна Кореја е прва по број на пушачи пред Турција, Грција, Естонија и Јапонија.