Женската кошаркарска репрезентација на Македонија, вечерва во Кавадарци ќе го одигра вториот натпревар од квалификациите за Европското првенство кое ќе се одржи 2015 година во Унгарија и Романија.
По убедливиот пораз во неделата на гостувањето во Литванија 108:66, избраничките на селекторот Горан Јовановиќ, вечерва пред кавадаречката публика во салата „Јасмин“ ќе се обидат да направат изненадување во дуелот со селекцијата на Велика Британија.
Противникот, кој со години наназад е во самиот врв на европската женска кошарка, ја ужива фаворитската улога пред мечот, но мотивацијата, тимскиот дух и домашниот терен даваат дополнителна сила на нашиот подмладен состав, кој амбициозно гледа на добар резултат.
Ова е натпревар од групата Б во која во рамките од 2. коло вечерва ќе играат Белгија и Литванија. Натпреварот Македонија – Велика Британија ќе започне во 19 часот и 30 минути.