Со убедливи победи пред своите навивачи против Пелистер Спорт, односно Апаве, екипите на Вардар и Работнички се пласираа во завршницата од кошаркарскиот Куп на Македонија.
Вардар го совлада Пелистер Спорт со 74:59 и заедно со оние 69:69 од првата средба играна во Битола, скопскиот состав успешно го мина квалификацискиот двомеч од Купот.
Српските интернационалци, Драган Керкез и Жарко Ѓуриќ го завршија мечот со дабл-дабл учиноци комбинирајќи 32 поени и 22 скокови. Кај Пелистер, Анакиевски постигна 23 поени, меѓу кои четири тројки од исто толку обиди.
Работнички и покрај поразот во првиот меч од Апаве од 75:70, не дозволи комплетно изненадување и предводен од двете нови засилувања, Абукар и Голдваер, убедливо славеше со 77:56 во реваншот игран во „Градски парк“.
Мохамед Абукар беше најдобар поединец на средбата со 23 поени и 7 скокови, а заедно со него, одлично деби во тимот на Емил Рајковиќ имаше и Лемир Голдваер реализирајќи 12 поени, на кои додаде и 5 скокови, 5 асистенции и 6 украдени топки.
Последниот патник ќе се бара од мечот во Струмица во вторник помеѓу домаќинот и Карпош Соколи.