Високорангиран претставник на Фудбалскиот сојуз на Федерацијата на БиХ и двајца фудбалски судии кривично ќе одговараат поради местење натпревари и примање поткуп, официјално е соопштено денеска во Сараево.
Обвинети се Владимир Доминковиќ (53), претседател на Одборот за судии и делегирање на Фудбалскиот сојуз на Федерацијата на Босна и Херцеговина (ФБиХ), како и Илија Живковиќ (39) и Кенан Бајрактаревиќ (36), и двајцата фудбалски судии и членови на ФБиХ.
Како што соопшти Обвинителство на БиХ, Доминиковиќ во својство на овластен претставник ги делегирал Живковиќ и Бајрактаревиќ за главни судии на одредени натпревари со цел двајцата да влијаат на крајниот резултат.
Тројцата обвинети, потоа, од раководства и претседатели на фудбалски клубови во земјата барале и примале поткуп во износ од 100.000 до 200.000 денари по натпревар.
Незаконски стекнатите средства тројцата ги делеле меѓусебе, а досега се потврдени најмалку два случаја на примање поткуп за влијание врз конечниот исход на натпреварите.