Италијанецот Серџо Скариоло е најсериозен кандидат за селекторското место на шпанската кошаркарска репрезентација кое остана празно по оставката на Хуан Антонио Оренга, пренесуваат медиумите во Шпанија.
Скариоло и претходно ја има водено „црвената фурија“, а во моментов е без ангажман, откако летово му истече договорот со екипата на Лаборал.
Италијанскиот стручњак селекторската функција на Шпанија ја извршуваше во периодот 2009-2012, време за кое освои две злата на Европските првенства и едно сребро на Олимписките игри во Лондон.
Шпанија беше домаќин на неодамна завршеното Светско првенство и иако покрај САД важеше за најголем фаворит за трофејот, на крајот остана без медал. Во четвртфиналето Шпанците беа елиминирани од Франција.