Карлос Сајнц Џуниор изјави дека го видел новиот Мекларен, со кој ќе настапи за 2019, и дека е охрабрен. Според новодојдениот пилот, претстои добра година пред тимот.
– Новите правила отвораат можност пред тимовите кои имале тешкотии минатата сезона. Го видов болидот во фабриката и многу ми се допаѓа како дизајн, иако уште не е обоен. Многу е различен и на прв поглед ми се допадна. Видов исто и кадри со боите на дизајнот, како и аеродинамиката, и сум многу задоволен. Сега најважно е какви ќе бидат резултатите на тестовите, изјави синот на легендарниот рели возач.
Сајнц додаде уште дека британскиот тим извлекол многу лекции од 2018, откако откриле се што не е во ред. Со реконструкцијата и напорите на целиот тим, Мекларен ќе се обиде да се врати таму каде што беше пред десетина години.
Карлос коментираше и какви се шансите за враќање на Алонсо во 2020.
– Уште е многу рано да се процени, тој штотуку си замина. Импресиониран сум од она што го прави тој во моментов, бидејќи знам на што е способен, заврши новиот пилот на Мекларен.