Италијанскиот автомобилистички ас Алесандро Занарди ја освои параолимписката титула во велосипедизам во Лондон.
45-годишниот Занарди пред 11 години остана без двете нозе при стравичен инцидент на Индикар трката на патеката Лојсицринг во Германија, но никогаш не го загуби спортскиот и натпреварувачки дух.
Куриозитет е тоа што поранешниот пилот во Формула 1 златото на Параолимпијадата во Лондон ја освои на патеката „Брендс хеч“, која е поранешна Ф1 патека.
Занарди во два наврати настапуваше во Формула 1, од 1991 до 1994 година и во 1999 година, а двапати се натпреваруваше и во северноамериканска Индикар КАРТ Серија.
На таа кобна трка во Германија, Ѕанарди беше водечки, а до крајот му преостануваа уште 13 круга. На излез од боксовите наиде на гужва, а во него се заби сонародникот Алекс Таљиани со брзина од преку 350 километри на час. Занарди остана без двете нозе и беше на раб на смртта поради големото количество на крв, а го реанимираа дури седумпати.
По осум дена тој се разбуди од кома и сфати дека останал инвалид: „Да, ги загубив нозете, но ги имам жената и синот“.
Веднаш откако му се подобри здравствената состојба најави нов спортски поход, велејќи дека несреќата ќе ја претвори во голема победа, што ќе се прераскажува на неговите внуци и на пријателите. До тоа навистина дојде вчера на Параолимписките игри во Лондон, кога триумфираше со предност од 27 секунди пред второпласираниот.
„Ова е голем успех, напорно работев и среќен сум што успеав да го доживеам овој голем успех. Чувството е неверојатно“, изјави Занарди.