Тренерот на Карпош Соколи, Драган Николиќ во изјава за клупскиот сајт нагласува дека враќањето на самодовербата кај кошаркарите по неговото доаѓање во клубот е рецептот за успешните резултати.
– Немаше никаква магија во сето ова што ни се случи. Во Карпош Соколи се работело добро и пред моето доаѓање, кога всушност се поставени темелите потребни да се случи тоа што се случи. Беше само потребно да им се крене самодовербата на играчите и да се уверат дека имаат квалитет за многу поголеми работи од што покажа стартот од сезоната, кога се нанижаа порази, нагласува Николиќ
Тој се заблагодари за довербата од раководството на клубот.
– Клучна беше и вербата која челните луѓе на клубот ја покажуваа во тие моменти, покажувајќи истрајност и решеност, знаејќи дека се на вистинскиот пат кон успехот. Ќе беше голем срам за мене, стручниот штаб и за играчите ако не ја наградивме мотивираноста и духовното и материјално вложување до максимум на луѓето од управата, на кои сите сме им бескрајно благодарни за се што ни овозможија и што не кренаа раце кога беше најтешко. Исто така, би и се заблагодарил и на публиката која постојано беше со нас и која ни ја даваше и тоа како потребната енергија кога беше најпотребно, дополнува српскиот стратег.
Предводени од Драган Николиќ „Соколите“ го освоија Купот на Македонија, обезбедија опстанок во регионалната АБА лига и беа дел од финалето на плеј-офот во домашното првенство.