Македонската кошаркарска федерација денеска ја објави програмата според која ќе течат подготовките на А-репрезентацијата која од 4 до 22 септември ќе настапи на Европското првенство во Словенија.
Почетокот на подготовките е закажан за 19 јули во Скопје.
Од 26 јули до 4 август македонските кошаркари ќе престојуваат во Словенија каде на 27 јули ќе одиграат натпревар со Полска, а на 28 јули ќе спарингуваат со Словенија.
Следуваат два натпревара со Хрватска во Загреб на 6 и 7 август.
Репрезентацијата потоа се враќа во Скопје. На 11 август е предвиден меч со Грузија, а на 17 август со Литванија.
Најсилниот противник во подготовките на „црвено-жолтите“ ќе биде Шпанија, на која Македонија ќе и гостува на 19 и 20 август.
Од 22 до 27 август избраниците на селекторот Алеш Пипан ќе учествуваат на турнир во Франкфурт, Германија. Таму ќе играат со БиХ, Грција и Германија.
На 27 август договорена е контролка со Русија, но останува да се дефинира дали ќе се одигра во Скопје или Москва.
Завршните подготовки ќе се одвиваат во Скопје од 29 август до 2 септември.