Фудбалерите на Металург, иако важеа за големи фаворити во двомечот со Биркиркара, сепак не остварија победа ниту во реваншот одигран попладнево на „Милано Арена“ во Куманово.
Македонскиот претставник одигра само 0:0 со гостинот од Малта, но благодарение на головите постигнати во гости (првиот натпревар заврши 2:2) „металурзите“ обезбедија пласман во 2.коло од квалификациите во Лига Европа.
Во следното коло Металург ќе игра со полскиот претставник Рух Хорзов. Првиот натпревар ќе го одигра на гостински терен на 19 јули, а реваншот е седум дена подоцна.
Вечерва од 20 часот и 30 минути Ренова ќе го одигра реваншот против Либертас во Сан Марино. Првиот натпревар меѓу овие две екипи заврши со убедлива победа на Ренова од 4:0.
Третиот македонски претставник во 1.коло од квалификациите во ЛЕ, Шкендија во вторникот ги заврши настапите во ова натпреварување по поразот од Портдаун на гости со 2:1. Во Куманово на првиот дуел беше 0:0.