Грчкиот фудбалски тренер Такис Лемонис се враќа на клупата на Олимпијакос по четири месеци. Тој ќе го наследи отпуштениот Бесник Хаси.
За Лемонис ова е четврто назначување за тренер на тимот од Пиреја со кого мината сезона ја освои титулата во Грција. И тогаш, слично како и сега, Лемонис дојде кога „црвено-белите“ се наоѓаа во незавидна ситуација, но подоцна беше сменет со албанскиот тренер Хаси.
Лемонис се смета за легенда на Олимпијакос поради десетте сезони поминати во овој клуб како играч, а потоа во пет сезони како тренер освои пет шампионски титули во Грција и еден национален куп.
Првиот дуел по враќањето на старо-новиот тренер Олимпијакос ќе го има утре на гостински терен со Јувентус.