Екипата на Карпош Соколи во крајно неизвесен и драматичен натпревар дури по две продолженија го совлада тимот на Гоце Делчев во Штип со 91:89.
Ова беше втора победа за Соколи со што го задржаа максималниот учинок, а двете победи ги остварија на гостински терен.
Тимот од Скопје влезе како фаворит на ово меч, но дебитантот во Првата лига, покажа дека е исклучително мотивиран за надигрување и не дозволи недостижно одлепување на противникот во ниту еден момент од мечот.
Во второто полувреме, Соколи за прв пат стигнаа до посериозна разлика, а штипјани влегоа во проблеми откако Даниел Калов и Бранислав Радак мораа порано да ја завршат средбата со по пет лични грешки. Сепак, предводени од Никола Караколев, кошаркарите на Гоце Делчев успеаја најпрво резултатски да се доближат, а потоа и да изедначат за 69:69 по 40 минути игра.
Во првото продолжение на 4 секунди до крајот Соколи водеа со два поени, а Петрушев беше прецизен и го одведе мечот во второ продолжение по 81:81.
И во вторите дополнителни пет минути беше драматично. Сепак поискусниот тим стигна до двата бода, иако се укажа нова шанса за Гоце Делчев и повторно преку Петрушев кој имаше можност преку нови две слободни фрлања да донесе и ново, трето продолжение. Петрушев го промаши првото, а потоа и второто со обид за евентуален офанзивен скок, но кошаркарите на Карпош Соколи добро затворија во рекетот и стигнаа до победата.
Денеска играат Водњански Лисици – Работнички и Куманово
Второто коло се комплетира утре со мечот Фени Индустри – Струмица.