Фудбалскиот сојуз на Хрватска по двата кикса на репрезентацијата во квалификациите за Светското првенство реши да му даде отказ на селекторот Анте Чачиќ, а на негово место е наименуван малку познатиот тренер Златко Далиќ.
Новиот „изборник“ ќе ја предводи Хрватска на последниот квалификациски дуел на гости со Украина во Киев в понеделник.
По синоќешниот нерешен резултат со Финска (1:1) во Ријека и по денешниот вонреден состанок Чачиќ е сменет, а Далиќ ја прифатил понудата да го наследи.
Најдобрите резултати на новиот селектор како тренер се поврзани со екипи од Саудиска Арабија и од Обединетите Арапски Емирати, додека имал тренерски ангажмани и во Вартекс, Динамо Тирана, Ријека, Славен Белупо, Ал Хилал, Ал Фаисали.
Хрватска се наоѓа на второто место на табелата во групата зад Исланд, а пред Украина со која имаат ист број бодови. Евентуален нерешен резултат во Киев за Хрватска ќе значи освојување на второто место и најверојатно учество во баражите. Лидерот Исланд, кој има два бода повеќе, во последното коло игра дома со Косово.