Претседателот на европската фудбалска федерација УЕФА, Мишел Платини предложи Европското фудбалско првенство во 2020 година да биде организирано во цела Европа, а не само една или две земји.
„Таа е идеја, ништо уште не е дефинирано. Во декември или јануари идната година, ќе одлучиме дали домаќин на ЕУРО 2020 ќе биде една или две земји, или дури цела Европа”, изјави Мишел Платини на прес-конференција во украинската престолнина Киев, каде што во недела ќе се одигра финалниот натпревар од шампионатот во 2012 година што заеднички го организираа Полска и Украина.
Платини додаде дека „вклучувањето во организацијата на 12 или 13 градови, значително би ја олеснило организацијата и би се избегнале инфраструктурните проблеми со кои сега се соочуваат домаќините”.
За заедничка организација на Европското фудбалско првенство во 2020 година, инаку, заинтересирани се Шкотска и Велс, а кандидатура досега единствено поднесе Турција.
Идниот европски фудбалски шампионат во 2016 година ќе се одржи во Франција.