И покрај тоа што примија гол по само 9 минути игра, Франција на крајот стигна до 3:1 победа над Австралија за да има сигурен старт на одбраната на светската титула и покрај кризата со повредени играчи, која се зголеми со повредата на дефанзивецот на Баерн Минхен, Лукас Ернандез.
Австралија најави дека може да направи втора сензација денеска во Катар, откако во 9. минута по еден брз контранапад, Крег Гудвин го совлада Иго Љорис за шок на „триколорите“. Сепак, Франција бргу ја врати рамнотежата на теренот со постојана доминација во играта. Адриен Рабио беше клучниот човек за пресврт во средината на првото полувреме.
Прво тој по асистенција на Тео Ернандез, кој го замени својот повреден брат Лукас во 10. минута, израмни на 1:1 во 27. минута, за потоа фудбалерот на Јувентус да му асистира на Оливие Жиру во 32. минута за преземање на контрола на мечот. Ова беше 50. гол на Жиру за Франција, откако беше стартер во тимот на Дидие Дешам по повредата на освојувачот на „Златната топка“, Карим Бензема.
Во второто полувреме, Французите и покрај предноста, целосно доминираа во сите аспекти на играта, што во 68. минута резултираше со зголемување на водството откако Усман Дембеле го пронајде Килијан Мбапе за 3:1, за само четири минути подоцна, Мбапе да му асистира на Жиру за тој да го постигне 51. репрезентативен гол и да се израмни со легендарниот Тјери Анри како најдобар стрелец во историјата на Франција.
Извор: Топспорт