Женската фудбалска репрезентација на Англија како последна успеа да се пласира во полуфиналето на Европското првенство за жени што се одржува во Холандија. Синоќа во четвртфиналето Англија ја победи Франција со 1:0, а стрелец на голот беше Џоди Тејлор во 60.минута.
Пласман во полуфиналето избори и дебитантот Австрија со победата над Шпанија со 5:3 по изведувањето на пенали, откако во регуларниот дел беше 0:0. Изненадување направи Данска со победата над Германија со 2:1 на одложениот дуел, кој наместо во саботата се одигра вчера поради силниот дожд во Ротердам кога требаше да се игра натпреварот.
Пласман во полуфиналето обезбеди и домаќинот Холандија со победата над Шведска со 2:0.
Во полуфиналето во четврток (3.август) ќе играат Австрија – Данска и Холандија – Англија.