Српскиот претседател, Александар Вучиќ, вечерва имаше вонредно обраќање по повод изборите во Косово, во кое кажа дека партијата „Српска листа“ остварила најубедлива победа во својата историја со 98,07 проценти од гласовите на парламентарните избори, односно ги освоила сите 10 места во приштинскиот парламент.
На вонредната прес-конференција, Вучиќ рече дека тоа е порака од Србите на Косово и Метохија дека тие се цврсти, силни и ќе можат да ги бранат своите интереси на Косово.
Претходно, Горан Ракиќ, претседател на „Српска листа“ која е поддржана од официјален Белград, рече дека овие избори се одлучувачки за иднината на српскиот народ.
Според прелиминарните податоци излезоста на вонредните избори на Косово е 44 проценти, а засега во благо водство е „Самоопределување“ на Албин Курти.
Ветевендосја (Самоопределување) е радикална националистичка партија која, според прелиминарните резултати, има и добри шанси за власт, а станува збор за опција која не е особено склона кон Европската унија, пренесува хрватски „Индекс“.