Претседателот на Србија, Александар Вучиќ, му го предаде на српскиот член на Претседателството на Босна и Херцеговина, Милорад Додик, нацрт -законот за заштита на српскиот јазик и кирилицата, што треба да го усвојат собранијата на Република Србија и на Република Српска на Денот на националното единство на 15 септември, јави дописникот на МИА од Белград.
Вучиќ објави на Инстаграм дека бил домаќин на Додик и дека со него водел „суштински разговори за иднината на целиот регион“.
Како што наведе, тие особено ја разгледале иницијативата Отворен Балкан, но и конкретни проекти, како што е изградба на дел од автопатот од Кузмин до Бјелина.
-Се согласивме дека соработката меѓу Република Србија и Република Српска е исклучителна на сите нивоа и дека српскиот народ не смее и не може да си дозволи никакви конфликти и враќање во минатото, посочи Вучиќ.
Тој кажа дека единството и здружената акција во областа на економијата, културата, образованието, историската меморија во ниту еден момент не смеат да се доведуваат во прашање.