Тригодишно дете загина во пожар во белградската населба Железник. Како што објавија српските медиуми според неофицијални информации мајката на детето ја однела својата постара ќерка во основно училиште, а тригодишното дете останало да спие.
Од засега непознати причини избувнал пожар во барака од 30 метри квадратни, при што детето починало на лице место.
Во гаснењето на пожарот учествуваа пет противпожарни единици со 16 пожарникари. По локализирањето, во бараката е пронајдено безживотното тело на тригодишното дете, а како што изјави за Нова.рс Бајруш Ајвази, дедото на малото дете, кога ги видел пламените јазици се обидел да влезе, но и тој добил изгореници и не можел да го спаси момчето.
Полицијата и пожарникарите се на терен, а како што неофицијално се соопштува, пожарот настанал поради неисправни електрични инсталации.
Пожарникарите биле известени за пожарот околу 8 часот утрово и за четири минути биле на терен, но не успеале да го спасат детето.
Пожарот се проширил и на соседната куќа.