Еден на коњ, другиот на шлем, двајцата со меч во раката – вака српската редакција на британскиот јавен сервис Би-Би-Си ја почнува репортажата посветена на мега-спомениците во двата главни града, поставувајќи своевидна паралела меѓу „Воинот на коњ“ и неодамна подигнатиот споменик на српскиот средновековен владетел Стефан Немања.
„Скопје во 2010 година, за време на тогашната власт на ВМРО-ДПМНЕ на Никола Груевски, го започна проектот Скопје 2014 – архитектонско преобразување на градот, со реконструкција и изградба на повеќе десетици згради и поставување на десетици статуи што треба да ја симболизираат целата македонска историја,“ пишува Би-Би-Си во воведот на репортажата од Скопје. Во неа, ставовите на приврзаниците и противниците на контроверзниот проект ги застапуваат Вангел Божиновски и Ивана Драгшиќ, кои од нивна перспектива зборуваат и за белградскиот споменик.
„Наспроти бројните протести, проектот е реализиран се до смената на режимот кој го проектираше – иако ни новата власт на Социјалдемократскиот сојуз на Зоран Заев не се осмели да го сруши проектот, и покрај тоа што се покренати и судски постапки поради малверзациите во изградбата,“ пишува меѓу другото Би-Би-Си во освртот на „Скопје 2014“.