Вечерва во Подгорица дојде до повеќе судири помеѓу полицијата и демонстрантите. Опозицијата бара техничка влада која ќе организира избори, затоа што е убедена дека со измама власта повторно ќе ги добие изборите.
Пред црногорското собрание вечерва се уапсени повеќе демонстранти, а помеѓу нив се и припадниците на Движењето за неутралност, Марко Милачиќ и Владислав Дајковиќ.
Уапсени се и претседателот на Извршниот одбор на Матица Српска, професорот Владимир Божовиќ и Бошко Вукичевиќ од движењето „Слобода на народот“.
Полицијата на демонстрантите вечерва фрли солзавец и две шок бомби, а специјалните единици се стационирани на сите главни улици во центарот на Подгорица.
Група демонстранти во која беа и повеќе професори пред полицијата викаа „Отпор, отпор“, по што полицијата почна да ги турка и ги собори на земја.
Претседателот на црногорското собрание за недела на пладне закажа итен состанок со лидерите на политичките партии на кој треба да се разгледа нарушената политичка и безбедносна ситуација во земјата.