Тројцата вработени кои се водеа за исчезнати по силната експлозија што рано утрово се случи во фабриката за производство на експлозивен материјал во близина на градот Гревена во северна Грција, се пронајдени мртви, а нивната смрт ја потврдија од компанијата, јави дописничката на МИА од Атина.
-Во исклучително непријатна ситуација сме да ја потврдиме смртта на тројцата вработени, кои се наоѓаа во нашата фабрика во Гревена за време на несреќата, пишува во соопштението од компанијата што го пренесуваат грчките медиуми.
Несреќата се случи кусо пред девет часот утрово, а според локалните медиуми експлозијата била толку силна што се слушнала и во градот што е на оддалеченост од околу 30 километри.
Причините за експлозијата сè уште се непознати, а од фабриката соопштија дека целосно соработуваат со надлежните органи во истрагата за одредување на точните околности под кои се случи несреќата.
Извор: МИА