Најголемата опозициска партија во Грција, Сириза ја критикуваше реконструкција на Владата и истакна дека новиот Кабинет сигнализира „почеток на крајот“ за Владата на Грција.
„Новата Влада е наменска за политиките на меморандумот и за владините планови за комплетирање на политичкиот грабеж на приходите и за продажбата на јавните добра“, соопшти партијата.
Конзервативниот премиер Андонис Самарас вчера направи реконструкција на неговиот Кабинет, со цел да ја зајакне Владата откако Демократската левица, најмалата партија во владејачката коалиција, се повлече од владината коалиција поради затворањето на државната телевизија, оставајќи го Самарас со многу мало мнозинство во Парламентот.
Сириза во соопштението истакнува дека „рециклирањето на бројките во кабинетот не е доволно за да се маскира неуспехот на мерките за штедење“.
„Реконструкцијата не може да ја спаси Владата која се урива, туку напротив сигнализира почеток на својот крај“, стои во соопштението.