Министерството за надворешни работи на Србија реагираше на изјавата на албанскиот премиер Еди Рама за можното обединување на Албанија и Косово така што испрати соодветни инструкции до сите мисии при меѓународните организации и амбасади во земјите-членки на ЕУ, на СБ на ОН и до соседните земји, објави „Данас“.
Весникот наведува дека упатено е писмо и до претседавачот на Советот за безбедност при Обединетите нации со барање писмото да биде документ на СБ.
Во заедничко интервју на Рама и министерот за надворешни работи на Косово, Хашим Тачи, за приштинската телевизија „Клан Косово“, албанскиот премиер изјави дека „обединувањето на Косово и Албанија има две алтернативи и оти се зависи од пристапот на ЕУ“.
Рама наведе дека првата е обединување во ЕУ, но ако Унијата продолжи да ги затвора вратите на интеграција н а Косово тогаш „двете држави ќе бидат принудени да се обединат на класичен начин“.
Заедничката изјава на Рама и Тачи за обединување на Албанија и Косово ја критикуваше Европската комисија, нагласувајќи оти тоа е провокација која не е во согласност со политиката на соработка во регионот.