Албанскиот премиер Еди Рама изјави дека речиси една година се работи на подготвка на закон за легализација на марихуната за медицински цели во Албанија, јави дописничката на МИА од Тирана.
За таа цел, како што вели, се консултирале со најдобрите странски и домашни експерти.
– Веќе една година работиме на овој нацрт-закон, кој ќе биде готов набрзо. Ние не работиме без да се консултираме со странски и наши експерти на високо ниво. Главната работа што ја правиме е консултација со други кои имаат искуство за тоа. Ние не измислуваме ништо, учиме од другите. Нацрт-законот многу набрзо ќе биде готов и ќе биде ставен на јавна расправа, идентично како и нацрт-законот за фискална амнестија кој најпрво се дискутира со неколку меѓународни институции, рече Рама на заедничката прес – конференција со евроамбасадорот Луиџи Сореца.
Според Рама, во многу европски држави, меѓу нив и Македонија, марихуаната е легализирана за медицински цели.
Албанија е позната по големото нелегално производство на марихуана, која главно завршува на пазарот во западно европските земји.
Последните години, како што се проценува, се произведуваат по стотина тони марихуна, поради што од „Колумбија на Балканот“ сега го носи епитетот „Колумбија во Европа“.
Поради се поголемо производство во недостапните планински предели, полицијата првпат почна да користи дрон за нејзино откривање.
Делегацијата на ЕУ во Тирана, по изјавата на Рама соопштија дека во тоа не се вклучени ниту Европската унија, ниту Европската комисија.
„По барањата на некои медиуми, сакаме да разјасниме дека Европската комисија и Делегацијата на ЕУ ниту биле консултирани, ниту, пак, биле вклучени во подготовката или консултациите за нацрт-законот за одгледување и легализација на марихуана во Албанија за медицински цели, се наведува во соопштението на делегацијата.