По косовскиот премиер Авдулах Хоти, кој пред два дена објави дека е позитивен на коронавирусот, денеска и неговиот заменик, вицепремиерот Дритон Селманај, информира дека е заразен.
Тој веста ја објави на својата страница на Фејсбук, наведувајќи дека нема никакви симптоми.
– Вчера го направив тестот за Ковид-19 и денеска ме информираа дека сум резултирал позитивен. Здравствените специјалисти ми велат дека сум асимптоматичен. Од моментот на тестирање сум во изолација и вака сум принуден да останам и во наредните две недели, напиша Селманај, додавејќи дека должноста ќе ја извршува од својот дом.
Пред два дена, на 2 август, премиерот Хоти објави дека тестирањето кое го извршил дента покажало оти е носител на новиот коронавирус. Тој наведе дека нема видливи симптоми, освен лесна кашлица, и дека премиерските обврски во наредните две недели ќе ги извршува од својот дом, каде што ќе биде во изолација.