Светот не ги повтори грешките од пред 30 години кога Хрватска немаше општо изразување на солидарност како што има Украина, изјави денеска хрватскиот премиер Андреј Пленковиќ на отворањето на првиот парламентарен собир на Меѓународната кримска платформа.
На состанокот во Загреб, на кој присуствуваат 42 делегации од 32 земји, Европскиот парламент, Советот на Европа, ОБСЕ и НАТО, Пленковиќ рече дека хрватското домаќинство на состанокот е уште една симболична манифестација дека Хрватска „во овие тешки времиња чекори со Украина“ и дека не го напушта пријателот кога е во неволја.
„Да се биде со Украина е морален, правен и цивилизациски исправен чин. Мило ми е што светот не ги повтори грешките од пред 30 години, кога Хрватска немаше општо изразување на солидарност како што го има денес Украина“, нагласи Пленковиќ, додавајќи дека оваа солидарност е „без преседан“.
„Ние во Хрватска знаеме што е агресија, што е сила и негирање на правото на постоење. Ја цениме украинската борба за слобода, вистина и демократија“, додаде хрватскиот премиер.
Тој повтори дека во 1991 година Хрватска била меѓу првите што ја поддржале Украина во нејзината потрага по независност и дека Украина била меѓу првите што ја признале Хрватска и и тогаш и помогнала воено.
„Никогаш нема да го заборавиме тоа“, рече премиерот Пленковиќ, додавајќи дека Хрватска го цени она што го направи Украина во времето на тогашното „неправедно ембарго“ кон Хрватска.
Пленковиќ истакна дека конференцијата се одржува во контекст на нови брутални руски напади со беспилотни летала врз цивили и инфраструктура со цел да се „деморализира“ украинскиот народ пред зимата, но дека Украинците во изминатата година покажаа дека се „силни“ и дека не можат да бидат обесхрабрени кога „се удира врз нивниот идентитет “ и кога „на него се лепат етикетите на денацификација“.
Хрватскиот премиер повтори дека Крим и припаѓа на Украина, како и Доњецк и Луганск и сите „привремено окупирани територии“ кои Украина ќе ги врати и „ќе го оствари својот територијален интегритет“.
Пленковиќ рече и дека овој собир испраќа силна порака за поддршка на „светскиот поредок, кој се заснова на меѓународното право, на принципите на глобалниот менаџмент, зад кој стои целиот демократски свет“.
Извор: МИА