Пронајдени се телата на осуммина мигранти од бродот што потона во Егејско Море во близина на Бодрум, западна Турција, соопшти денеска Турската крајбрежна стража.
Во соопштението е наведено дека успеале да спасат 31 мигрант, чија националност не е наведена. На бродот имало 40 мигранти.
Локалните власти соопштија дека во 7 часот и 20 минути по локално време добиле тревога и додаваат дека несреќата се случила неколку километри од грчкиот остров Кос.
Во Турција има околу четири милиони мигранти и бегалци, кои претежно доаѓаат од Сирија.
Меѓународната организација за миграција (ИОМ) соопшти дека од почетокот на годината настрадале 555 мигранти во обид преку Средоземно море да стигнат до Европа.