Уставниот суд на Албанија попладнево информираше дека е одложена расправата, закажана за утре, во врска со одлуката на албанскиот парламент за разрешување на шефот на државата Илир Мета.
Според судот одлагањето е од причина што известителот за случајот се заразил со Ковид-19.
-Прашањето „за разрешување на претседателот на Република Албанија поради тешки повреди на Уставот“, чиј подносител е Собранието на Република Албанија кое на јавната пленарна седница требаше да биде на 18.01.2022 година, во 10:00 часот е одложено за 1.2.2022 година, во 10:00 часот, од причини што известителот на случајот е позитивен на Ковид-19, се наведува во известувањето на Уставниот суд.
Доколку седумте уставни судии одлучат во корист на одлуката на Собранието тоа би било прв преседан на разрешување на шеф на државата.
Разрешен или не од Судот, на Илир Мета за неколку месеци, односно на 24 јули годинава, му завршува мандатот, како што самиот најави, се враќа на политичката арена, на чело на партијата Движење за социјалистичка интеграција(ЛСИ), што тој ја формира, а по изборот за шеф на државата партијата ја предводи неговата сопруга Моника Круемади.
Извор: МИА